- Орон нутгийн цагдаагийн үйл ажиллагаа болон гэмт хэргээс айх айдсыг 1981 оноос хойш хооронд нь холбож үзэх болсон. Учир нь Нью-Джерси мужийн Ньюаркад хийсэн нэгэн судалгаагаар цагдаагийн алба хаагчид явган эргүүл хийснээр тухайн орон нутгийн ард иргэдийн амгалан тайван байдлыг хангаж байдаг нь тогтоогдсон юм. Тун удалгүй, энэ судалгааг бататгах үүднээс Мичиган мужийн Флинт хотод дахин судалгаа авсан бөгөөд үр дүн нь адилхан гарсан. Чухам энэ үеэс хойш цагдаагийн алба хаагчдын нэг зорилго нь ард иргэдийн гэмт хэргээс айх айдсыг бууруулах болж хувирсан бөгөөд үүнийг гүйцэтгэх хамгийн шилдэг арга нь орон нутгийн цагдаагийн үйл ажиллагаа байсан юм.
- Гэмт хэргээс айх айдас нь ард иргэд болон орон нутагт маш хортой. Айдсаас болж ард иргэд өөрсдийн ажил үүрэг болон чөлөөт цагийг хязгаарлаж эхэлдэг. Ялангуяа өндөр настнууд, хүүхэд багачууд болон эмэгтэйчүүд гэх зэрэг нийгмийн эмзэг бүлгүүд өөрсдийн амьдралыг хязгаарлаж эхэлдэг. Түүнчлэн, айдсаас болж орон нутгийн аж ахуйн нэгжүүд бизнесээ алдаж, орон нутгийн оршин суугчид нүүж эхэлдэг. Энэ нь нөхцөл байдлыг улам дордуулж, улмаар тухайн орон нутгийн амьдрал болон аж ахуйд маш сөргөөр нөлөөлдөг. Ард иргэд гэмт хэргээс айж, гадуур дотуур явах үзэгдэл нь буурснаар нийгмийн амьдрал хохирч эхэлдэг.[1]
- ↑ Хууль сахиулахын их сургуулийн Эрдэм шинжилгээ, хөгжлийн хүрээлэн, Цагдаагийн шинжлэх ухааны зарим нэр томьёоны гарын авлага, Улаанбаатар 2017
