цагдаагийн алба хаагчдын амиа хорлолт

Хадмал үг

[англ.police suicide ]

Тайлбар

Барууны улс орнуудад цагдаа нарын амиа хорлох явдал бусад мэргэжлийн хүмүүстэй харьцуулахад их байгаа нь судалгааны ажлын чухал сэдэв болж байгаа бөгөөд түүний шалтгаан нь янз бүр, тогтооход хялбар биш юм. Судалгаанаас харахад ихэвчлэн цагаан арьстай, насны хувьд 36.9 настай, гэр бүлтэй, хууль сахиулах байгууллагад 12.2 жил ажилласан ажилчид амиа хорлох илүү их магадлалтай байна. Амиа хорлогчдын 86.3 % нь ажлын бус цагаар, гэртээ /54.8%/, буу зэвсэг хэрэглэн /90.8%/ амиа хорлосон байна. Зарим судалгаагаар цагдаагийн бие бүрэлдэхүүний стресс, сэтгэл гутрал, сэтгэл зүйн асууудлууд, ажлын ачаалал, архидан согтуурах явдал илүү их нөлөөлдөг гэж тогтоосон байна.

Хэдийгээр цагдаагийн алба хаагчдын сонгон шалгаруулалт, мэргэжлийн хувьд стресс үүсгэгч гадаад, дотоод хүчин зүйлсийг бууруулах талаар арга хэмжээ авч байгаа ч цагдаагийн ажилтны амиа хорлох явдлын шалтгаан нөхцөл, онцлог шинж болон урьдчилан сэргийлэх стратегийн асуудлууд тулгамдсаар хэвээр байна.

Монгол Улсын цагдаагийн төв байгууллагаас 2015 онд хийсэн эрүүл мэндийн судалгаагаар төв, орон нутгийн цагдаагийн газар, хэлтсүүдийн 6500 алба хаагч буюу 69.7% эрүүл мэндийн урьдчилан сэргийлэх үзлэгт хамрагдаж, 30.2% нь үзлэгт хамрагдаагүй байна. Нийт алба хаагчдын 31.7% илүүдэл жинтэй, албан үүргээ гүйцэтгэж яваад бэртэж гэмтсэн, алба хаагч 0,4% нь нохойд хазуулсан, зүсэгдсэн, хутгалуулсан шарх, гар хөлөө хугалсан, зөөлөн эдийн гэмтэл, толгой доргих зэргээр хөдөлмөрийн чадвараа алдсан байна. Өвдсөн алба хаагчдаас хамгийн их өвчлөл нь бөөрний үрэвсэл 10.9%, ходоодны архаг үрэвсэл 6.1%,нурууны эмгэг өөрчлөлт 5.6% тус тус байна. Цагдаагийн алба хаагчдын ажлын ачаалал, стресс бухимдал, ажлын орчин, нөхцөлөөс шалтгаалан амиа хорлох явдал ирээдүйд гарч болзошгүй учраас анхаарах явдал мөн.